കൊച്ചി : ചലച്ചിത്ര മേള ഉദ്ഘാടനച്ചടങ്ങിൽ നിന്ന് നടൻ സലിംകുമാറിനെ ഒഴിവാക്കി. ദേശീയ പുരസ്കാര ജേതാവായ തന്നെ ഇഴിവാക്കിയതിനെതിരെ നടൻ സലിം കുമാർ ശക്തമായി പ്രതികരിച്ചു.
എറണാകുളം ജില്ലയിലെ അക്കാദമി അവാർഡ് ജേതാക്കളായ 25 പേർ ചേർന്ന് ചടങ്ങിൽ തിരിതെളിക്കുമെന്ന് നേരത്തേ അറിയിച്ചിരുന്നു. എന്നാൽ 25 പുരസ്കാര ജേതാക്കളുടെ ഒപ്പം സലിംകുമാറിൻ്റെ പേരില്ല.
തിരിതെളിക്കുവാൻ അക്കാദമി അവാർഡ് ജേതാക്കളായ 25 പേരെ ക്ഷണിക്കുമെന്ന് അറിഞ്ഞതോടെ മൂന്ന് അക്കാദമി അവാർഡുകളും ടെലിവിഷൻ അവാർഡും കേന്ദ്ര പുരസ്കാരവും നേടിയിട്ടുള്ള തന്നെയും ക്ഷണിക്കുമെന്നാണ് പ്രതീക്ഷിച്ചിരുന്നതെന്നും എന്നാൽ ക്ഷണം ലഭിച്ചില്ലെന്നും പ്രായക്കൂടുതലാണ് കാരണമായി പറഞ്ഞതെന്നും സലിം കുമാർ പറഞ്ഞു.
തന്നെ വിളിക്കാത്തതിൻ്റെ കാരണത്തെക്കുറിച്ച് ചോദിച്ചപ്പോള്‍ പ്രായം കൂടുതലാണ് എന്ന മറുപടിയാണ് അധികൃതരിൽ നിന്നും ലഭിച്ചതെന്നും താരം വ്യക്തമാക്കി.
തനിക്ക് 90 വയസായിട്ടില്ല എന്നും തൻ്റെ സഹപാഠികളാണ് അമൽ നീരദും ആഷിഖ് അബുവും എന്നും അവരേക്കാൾ രണ്ടോ മൂന്നോ വയസ് കൂടുതൽ മാത്രമാണ് തനിക്കെന്നും സലിം കുമാർ പറയുന്നു.
ചടങ്ങിലേക്ക് ക്ഷണിക്കാത്തതിൻ്റെ കാരണം കൃത്യമായ രാഷ്ട്രീയമാണെന്നും സിപിഎം മേളയിൽ കോൺഗ്രസുകാരനെ പങ്കെടുപ്പിക്കുന്നില്ലല്ലോ എന്നും സലിംകുമാർ പ്രതികരിച്ചു.
തന്നെ മാറ്റി നിർത്തുന്നതിൽ ആരൊക്കെയോ വിജയിച്ചുവെന്നും ഇത് സിപിഎം മേളയാണെന്നും അദ്ദേഹം പറഞ്ഞു.
‘എറണാകുളത്തെ അവാർഡ് ജേതാക്കളായ 25 പേർ ചേർന്ന് മേളയുടെ തിരി തെളിയിക്കുന്നതായാണ് ഞാൻ അറിഞ്ഞത്. സ്വാഭാവികമായും എന്റെ പേരും ഉണ്ടാകുമല്ലോ? ഒരു ഗവൺമെന്റ് തരുന്ന മൂന്ന് പുരസ്കാരങ്ങൾ കിട്ടിയ സ്ഥിതിക്ക് ഞാനും ഉണ്ടാകുമെന്ന് പ്രതീക്ഷിച്ചു’.
‘എന്നാൽ പിന്നീടൊന്നും അതിനെക്കുറിച്ച് കേട്ടിരുന്നേയില്ല. അപ്പോൾ മേളയിലെ കമ്മിറ്റി അംഗമായ സോഹൻലാലിനെ വിളിച്ചിരുന്നു. പ്രായക്കൂടുതലുള്ള ആളുകളെ ഒഴിവാക്കി ചെറുപ്പക്കാരെയാണ് വിളിക്കുന്നതെന്നാണ് ലഭിച്ച മറുപടി. പ്രായത്തിന്റെ കാര്യം പറഞ്ഞാല്‍ ആഷിക് അബുവും അമല്‍ നീരദുമെല്ലാം കോളജില്‍ എന്റെ ജൂനിയര്‍മാരായിരുന്നു. ഞാനും അവരും തമ്മില്‍ അധികം പ്രായവ്യത്യാസമൊന്നുമില്ല താനും. കൂടിപ്പോയാൽ മൂന്ന് വയസ്സു വ്യത്യാസം കാണും’
‘പിന്നീട് പ്രൊഡക്‌ഷൻ കണ്‍ട്രോളർ ബാദുഷ വിളിച്ചപ്പോൾ ‘നാളെ വരാമോ?’ എന്ന് ചോദിച്ചു. എന്നെ കളിയാക്കുകയാണോ എന്നാണ് ഞാൻ തിരിച്ചു ചോദിച്ചത്. കാരണം ഒരുമാസം മുമ്പ് തിരി തെളിയിക്കുന്ന ആളുകളുടെ പട്ടിക എല്ലാം വന്നശേഷം ഞാൻ അങ്ങോട്ട് വിളിച്ചു ചോദിച്ചു എന്ന കാരണം കൊണ്ടു മാത്രം അവസരം തരാം എന്ന് പറഞ്ഞാൽ എന്താണ് ചെയ്യുക’യെന്നും സലിം കുമാർ ചോദിക്കുന്നു.
‘പ്രായപരിധി അൻപത് വയസ് ആണത്രേ. അതല്ല ഇവിടെ രാഷ്ട്രീയമാണ് വിഷയം. അവാർഡ് കിട്ടിയ ഏക കോൺഗ്രസുകാരനാണ് ഞാൻ, അയാളെ മേളയിലേക്ക് അടുപ്പിക്കാൻ പറ്റില്ല, അതുതന്നെയാണ് കാരണം. അത് പച്ചമലയാളത്തിൽ പറഞ്ഞാൽ എനിക്കു മനസിലാകും. ഒരു സിപിഎം മേളയാണ് അവിടെ നടക്കുന്നത്. അവരുടെ ആളുകളെ മാത്രമെ പങ്കെടുപ്പിക്കൂ.’വെന്നും സലിം കുമാർ പ്രതികരിച്ചു.
‘അബദ്ധത്തിൽ വിട്ടുപോയതല്ല എൻ്റെ പേര്. തിരുവനന്തപുരത്ത് വച്ച് ടിനിടോം ഇക്കാര്യം അധികൃതരെ ചൂണ്ടിക്കാട്ടുകയും ചെയ്തിരുന്നു. എന്നെ മാറ്റി നിർത്തുന്നതിൽ ആരൊക്കെയോ വിജയിച്ചു. ആ വിജയം വിജയമായിട്ടിരിക്കട്ടെ. അവർ സന്തോഷിക്കട്ടെ. ഞാൻ എന്തായാലും ചടങ്ങിൽ പങ്കെടുക്കാൻ പോകുന്നില്ല. ഏതെങ്കിലും നേട്ടങ്ങൾക്കു വേണ്ടി പാർട്ടി മാറാൻ ഉദ്ദേശിച്ചിട്ടില്ല. എനിക്ക് ഇവിടെ പുരസ്‌കാരം ലഭിച്ചിട്ടുള്ളത് കോണ്‍ഗ്രസ് സര്‍ക്കാര്‍ ഭരിക്കുമ്പോള്‍ മാത്രമായിരുന്നില്ല.’
‘സിപിഎം ഭരിക്കുമ്പോഴും ഞാൻ പുരസ്‌കാരം നേടിയിട്ടുണ്ട്. എന്തുകൊണ്ടാണ് ഒഴിവാക്കിയത് എന്ന് അറിയാനാണ് നേരിട്ട് വിളിച്ച് ചോദിച്ചത്. പ്രായക്കൂടുതല്‍ എന്നാണ് കാരണമായി അവർ പറഞ്ഞത്. അത് വളരെ രസകമായ മറുപടിയായിട്ടാണ് തോന്നിയത്. കലാകാരന്‍മാരെ എന്തു വേണമെങ്കിലും ചെയ്യാമെന്ന് അവര്‍ നേരത്തേ തന്നെ തെളിയിച്ചിട്ടുള്ളതാണല്ലോ. അതാണല്ലോ പുരസ്‌കാരം മേശപ്പുറത്ത് വച്ചു നല്‍കിയത് എന്നും സലീം കുമാർ പറഞ്ഞു.
Discussion about this post